Health Update: Adokgre-o Health & Wellness Centre-ko nokdonggaaThe Shillong Times – What Experts Say

RESUBELPARA: Mongolbar salo, North Garo Hills a·jani Adokgre C&RD Block ning·o donggipa Dilma A·dap songo, Ayushman Bharat Health & Wellness Centre (HWC)-ko, Kharkutta-ni MLA Rupert Momin, nokdonggae on·angaha.
Ia Ayushman HWC-ko, Dilma A·dap jolo donggipa dingtang dingtang songni manderangna an·seng baljokaniko on·na miksonganio kuliaha.
Ia Health & Wellness Centre-ko nokdonggae on·angani somoio, Kharkutta-ni MLA Rupert Momin, tom·anio bak ra·giparangna aganprakengon, ia gital sub-centre-ko kulianichi, jolni manderangna an·seng baljokaniko on·na man·gnok ine parakataha.
Ia sub-centre-ko kulianichi, songni manderang, mongsongbate me·chik aro bi·sarang, bang·en namgnirangko man·gnok ine janapatengon, ia health centre-ni ning·o on·enggipa dingtang dingtang sanna banani cholrangko ra·china gita Momin, songni nokni manderangko didiangaha.
Momin-ni aganani gitade, Dilma A·dap jolo donggipa dingtang dingtang songni manderang, skangode sanna bananirangko ra·na, chel·a biaprangonasa re·ange ra·na nangachim indiba da·ode ia songon Health & Wellness Centre-ko kuliahani gimin songni manderang, neng·mangijan sanna bananirangko ra·na man·aignok.
Bi·sarangko naljokani gnangsa an·pakna nangani gimin janapatengon, an·pakani somoirango ma·gipa aro bi·sana maming kenna nangani dongjana gita pangnan health centre-rangonasa re·ange bi·sarangko an·pakchina gita Momin, songni manderangko, mongsongbate me·chikrangko ku·pattiangaha.
Ia tom·anio, North Garo Hills a·jani Deputy Commissioner Dr Abhishek Saini-ba dongpae jinmana aganprakengon, North Garo Hills a·jani damsa diltubatsranggipa biapo sub centre-ko kuliahani gimin Health Department-ko mittelpilangaha. An·seng baljokani aro lekka pora gita mandena nangchongmotgipa kamrangko, chel·a biaprango donggipa manderangnaba sokatna gita sorkari rakbee kamko ka·enga ineba Dr Saini aganaha.
Ia Ayushman Bharat Health & Wellness Centre-ko nokdonggaanio dongpae bak ra·anggipa gipin manderangara, Adokgre C&RD Block-ni BDO Diganto Hajong, North Garo Hills a·jani District Medical & Health Officer (DM&HO) Dr Priya Sengse R Sangma, SDM&HO Dr NR Marak, North Garo Hills a·jani DIO In-charge Dr RK Sangma, gipin medical officer-rang, Health Department-o kam ka·enggiparang aro Dilma A·dap jolrango songdongenggipa manderang ong·a.